漢字的束縛？

頭前講了有理，毋過上可惜的是即兩句毋成話：「用漢字，人kā你當做中國人」、「台灣人若beh建國，就愛脫離漢字ê束縛」...龜怪囉，羅馬字敢是台灣生出來的？he明明著是外國儂宣教師佇中國廈門發展出來的，100% Made in China的物件，即陣福建擱有一寡儂佇咧用，若照汝按呢講，chiah-ê儂計毋是中國儂囉？用羅馬字，儂著bē共汝當做中國儂是毋？喝台獨的儂若是攏即款腳數，我看獨立的路猶擱真歹行。後來的台羅嘛是教會羅馬字（白話字）小改一咧的物件，若準講照頂懸的講法講紲落去，kiám-chhái我嘛會使講：「用羅馬字，人kā你當做食教的」、「台灣人若beh自決，就愛脫離羅馬字ê束縛」，大家攏來用白話字，大家攏會用hông看做是信耶穌的，上少hiah-ê寫台文的會變做基督徒，按呢贊喔！即聲毋免擱chiah艱苦去傳福音，嘛毋免去舞啥物「新倍加運動」矣！哈利路亞感謝謳咾主！