遮是我今年一月時佇中研院民族所，拄著一個滯八里的民俗工作者，當伊咧講話的時錄的。照洪惟仁教授的講法，八里和淡水彼搭位仔是「老同安區」，即款台北腔參市內略仔無共，市內的khah成廈門腔，特別是e和oe韻母；若淡水、八里即爿的，比較khah接近同安腔，若斟酌聽即段錄音，會使真清楚聽著央元音ir kap er，下平調變調了後聽起來親像上去，雖罔市內的腔口嘛是按呢，毋擱即陣愈來愈少聽著矣，聽起來kiau優勢腔相共。猶擱有，伊講chia kap hia會變做下平，遮明顯是漳泉濫khah倚漳州的聲調，廈門和同安即款漳泉濫的腔口計是按呢講。咱會用講淡水八里即搭的同安腔猶擱保留「第一擺漳泉濫」的聲，顛倒是台灣的漳州腔佇咧漳泉濫了後已經毋咧講即號聲調。
