日本時代戶籍謄本

即暫仔因為卜申請美國簽證，我著走一逝戶政事務所，去申請阮規口灶的戶籍謄本，順紲想講看有法度申請日本時代的無？路尾是有申請著啊，不而過干凋會使申請著阮阿公彼代的，ham in兄弟姊妹的資料嘛無法度看，因為若我的身分只會當申請三等親以內的。
即份謄本的戶長應該是我的伯公，所以佇阮阿公身分添注的所在寫「弟」，亦著是葉和的地四個後生（阿本仔寫了重誕，變做葉「知」），「姪」就是in「孫仔」，啊著是阮阿姑。「葉千惠子」本底是上大漢的阿姑，毋擱出世毋兩冬久著過身去矣，永過bat聽阮爸講過，即陣則知影伊的名。
彼當陣嘉義猶擱是互台南州管的，佇我阿公及祖嬤的空格仔內底攏寫一字「福」，代表是福建儂，彼個時陣日本儂共閩南儂寫「福」、客儂寫「廣」抑是「粵」、平埔的寫「熟」、山地原住民寫作「生」。擱有標註即個儂敢有食鴉片、敢有縛腳。