漳泉會館台灣分部小型聚會

漳泉會館是佇面冊頂懸一個社團，參加的儂包括台灣、中國、南洋kiau其他所在見若對閩南話的復興有熱情、有興趣的友志。其實面冊本然就有幾若個差不多的社團，比論講台語社及台語會，毋擱chiah-e儂儕儕以台灣為主，毋若欠缺對別的所在閩南語的認識，古井水雞嘛是袂少，擱較hai-的，佇版面頂三不五時就講一寡「台語毋是閩南語」的言論，擱去濫掺搬來一寡有孔無榫的「證據」，支持伊儂的台灣國族主義，互南洋、中國福建的網友氣死驗無傷，講一咧搆底天著烏一爿矣。即陣儂kiam-chhai是想卜共母語縛佇咧即塊島嶼，按呢，咱嘛的確無伊的法。

因為按呢，咱尊敬的一寡對岸的朋友先覺歸直出來成立一個新的團體「漳泉會館」，強調國際化的閩南語討論，還閩南語本底應該有的海洋文化特色，嘛有一寡儂包括本儂在內，choann5退出台語社，加入漳泉會館。

即張相上倒手爿是我，中央是阿天，正手爿的是邱的。In兩股攏是腹內真有膏的，阿天本是台灣儂，出世七個月了後就搬去美國，尾仔擱去過儕儕所在，即陣佇越南，所以真儕所在的閩南語腔口、語詞伊攏捌。邱的是台北儂，即陣的少年儂會曉講按呢正港的台北腔實在是真phai揣，阮三個禮拜下晡約佇中和緬甸街見面，會使講是漳泉會館台灣分部的聚會，彼日聽著一寡阿天佇海外的分享，嘛不止仔心適。平常時我是真罕得有機會講閩南話，身軀邊較少即款朋友，而且佇學術的場合有一寡物件對我來講較oh得用閩南話來講，顛倒是逐擺去福建、馬來西亞，講福建話的機會擱較儕。阮計是感覺閩南語是世界唐儂的共通語言，親像廣東話按呢，斷斷袂使縛佇台灣，若無是真拍損。向望大家會當按即個方向好好思考一咧。